مینز ٹی20 ورلڈکپ کے پانچویں میچ میں یک طرفہ مقابلے کے بعد افغانستان نے یوگنڈا کو شکست دیدی۔
گیانا کے پروویڈینس اسٹیڈیم میں کھیلے گئے مینز ٹی20 ورلڈکپ کے پانچویں میچ میں افغانستان کے دیے گئے 184 رنز کے ہدف کے تعاقب میں یوگنڈا کی پوری ٹیم 16ویں اوور میں 58 رنز کے مجموعی اسکور پر پویلین لوٹ گئی۔
اننگز کے آغاز سے ہی یوگنڈا کی بیٹنگ لائن مشکلات کا شکار رہی اور محض 58 رنز پر پوری ٹیم پویلین لوٹ گئی، اوپنر رونک پٹیل 4 رنز، روجر مکاسا بغیر رن اسکور کیے پویلین لوٹ گئے، سیمن سیسازی 4 اور دنیش نکرانی صرف 6 رنز بنا کر آؤٹ ہوئے جب کہ الپیش رمجانی بھی کوئی رن اسکور نہ کرسکے اور کیچ آؤٹ ہو گئے۔
مزید پڑھیں: ٹی20 ورلڈکپ: جنوبی افریقا نے سری لنکا کو 6 وکٹوں سے ہرادیا
بیٹر ریاض علی شاہ اور کپتان برائن اوبویا بھی وکٹ پر زیادہ دیر نہ رک سکے، ریاض علی نے 11 جب کہ کپتان برائن کوئی رن اسکور نہ کرسکے۔ روبن سن اوبویا نے مزاحمت کرتے ہوئے 14 رنز بنائے اور آؤٹ ہو گئے جب کہ بلال حسن 8 اور ہینری سین یونڈو کوئی رن نہ بنا سکے تاہم کوسمس کیووٹا 2 رنز بنا کر ناٹ آؤٹ رہے۔
افغانستان کی جانب سے پیسر فضل الحق فاروقی نے بہترین بولنگ کا مظاہرہ کرتے ہوئے 4 اوورز میں صرف 9 رنز دے کر 5 وکٹیں اپنے نام کیں، مجیب الرحمان 1 اور نوین الحق 2 وکٹیں لینے میں کامیاب ہو گئے۔
مزید پڑھیں: ٹی20 ورلڈکپ؛ نمیبیا نے عمان کو سپراوور میں 11 رنز سے شکست دیدی
قبل ازیں یوگنڈا نے افغانستان کے خلاف ٹاس جیت پر پہلے فیلڈنگ کا فیصلہ کیا۔ یوگنڈا کے خلاف پہلے بیٹنگ کرتے ہوئے افغانستان نے مقررہ 20 اوورز میں 5 وکٹوں کے نقصان پر 183 رنز بنائے۔ افغانستان کے اوپنر رحمت اللہ گرباز اور ابراہیم زردان نے ٹیم کیلیے 154 رنز کی پارٹنر شپ بنا کر ٹیم کو شاندار آغاز فراہم کیا، ابراہیم زردان 1 چھکے اور 9 چوکوں کی مدد سے 46 گیندوں پر 70 رنز اسکور کیے۔
156 کے مجموعی اسکور پر رحمت اللہ گرباز بھی پویلین لوٹے، انہوں نے 45 گیندوں پر 4 چھکوں اور 4 چوکوں کی مدد سے 76 رنز بنائے۔ افغانستان کی جانب سے نجیب اللہ زردان صرف 2 رنز اسکور کر پائے جبکہ گلبدین نائب 4 اور عظمت اللہ اورامزئی نے 5 رنز بنا کر آؤٹ ہوئے۔ محمد نبی 16 گیندوں پر 14 رنز اور کپتان راشد خان ایک گیند پر دو رنز بنا کر کریز پر موجود رہے۔
یوگنڈا کی جانب سے برائین مسابا اور کوسمس کیووٹا نے 2-2 وکٹیں اپنے نام کیں کیں جبکہ الپیش راماجانی ایک وکٹ لے سکے۔
افغانستان اسکواڈ:
افغانستان کی جانب سے کپتان راشد خان، وکٹ کیپر رحمان اللہ گرباز، ابراہیم زردان، نجیب اللہ زردان، محمد نبی، گلبدین نائب، عزمت اللہ عمر زئی، کریم جنت، مجیب الرحمان، نوین الحق، فضل الحق فاروقی پلیئنگ الیون کا حصہ ہیں۔
یوگنڈا اسکواڈ:
یوگنڈا کی ٹیم میں کپتان برائن مسابا، رونک پٹیل، کیپر سیمن سیسازی، روجر مکاسا، ریاضت علی شاہ، دنیش نکرانی، الپیش رامجانی، روبن سن اوبویا، بلال حسن، کوسمس کیئووٹا، اور ہینری سین یونڈو شامل ہیں۔
