ممبئی: تیلگو سپر اسٹار اداکار جونیئر این ٹی آر نے RRR جیسی بلاک بسٹر فلم کے ذریعے پورے بھارت میں اپنی دھاک بٹھا دی تھی اور اب وہ ایکشن ڈرامہ فلم ’دیورا‘ کے ساتھ دھماکہ خیز واپسی کررہے ہیں۔
’دیورا‘ دو حصوں پر مشتمل فلم ہے، جس کی ہدایتکاری معروف ڈائریکٹر کورتالا شیوا نے کی ہے، جبکہ پہلی قسط 27 ستمبر کو سینما گھروں کی زینت بنے گی۔
فلم کے دو چارٹ بَسٹر گانے پہلے ہی شائقین میں زبردست مقبولیت حاصل کر چکے ہیں، اور اب انتظار کی گھڑیاں ختم ہوچکی ہیں، کیونکہ فلم کا شاندار ٹریلر یوٹیوب پر ریلیز کیا جا چکا ہے، جس نے چند ہی گھنٹوں میں ریکارڈز بنانا شروع کر دیے ہیں۔
کورتالا شیوا نے جونیئر این ٹی آر کو بہترین انداز میں پیش کیا ہے اور ان کا ماس ایکشن اسٹائل شائقین کے لیے کسی تحفے سے کم نہیں ہے۔
’دیورا‘ میں این ٹی آر کو ایک ایسے کردار میں پیش کیا گیا ہے جو لوگوں کے دلوں میں خوف پیدا کرتا ہے۔ اس ایکشن سے بھرپور ٹریلر میں پرکاش راج کی وائس اوور، سیف علی خان اور جھانوی کپور کی جھلکیاں بھی شامل ہیں۔
