ممبئی: بالی ووڈ کے مسٹر پرفیکشنسٹ عامر خان نے کہا ہے کہ وہ فلمی دُنیا کے لیے خود کو خوبصورت نہیں سمجھتے۔
بھارتی میڈیا کے مطابق عامر خان نے بالی ووڈ اداکارہ ریا چکرورتی کے پوڈکاسٹ میں بطورِ مہمان شرکت کی، یہ قسط 23 اگست کو ریلیز ہوگی تاہم اس کا پرومو جاری ہوگیا ہے۔
پوڈکاسٹ میں ریا چکرورتی نے عامر خان سے پوچھا کہ کیا آپ کبھی خود کو آئینے میں دیکھ کر حیران ہوتے ہیں کہ آپ کتنے اچھے ہیں؟
اس سوال کے جواب میں عامر خان نے کہا کہ میں خود کو خوبصورت نہیں سمجھتا کیونکہ میرے علاوہ، بالی ووڈ میں کئی اسٹارز ایسے ہیں جن کی شخصیت پُرکشش ہے۔
عامر خان نے کہا کہ شاہ رخ خان، سلمان خان اور ہریتھک روشن اصل دیکھنے والے اسٹارز ہیں، یہ تینوں اسٹارز واقعی میں بہت ہینڈسم اور خوبصورت ہیں۔
مزید پڑھیں: عامر خان نے ریٹائرمنٹ کا فیصلہ کرلیا، جنید کو بھاری ذمہ داری دے دی
اداکار نے کہا کہ لوگ تو میرے کپڑوں کا مذاق اُڑاتے رہتے ہیں، میں جب بھی کہیں باہر جاتا ہوں تو سوشل میڈیا پر لوگ کہتے ہیں کہ یہ پتا نہیں کیا پہن کر آجاتا ہے۔
اُنہوں نے کہا کہ میں اب فلمی دُنیا سے الگ ہونا چاہتا ہوں، میں ہمیشہ کے لیے اداکاری چھوڑنا چاہتا ہوں۔ اداکار کی بات سُن کر ریا چکرورتی نے کہا کہ آپ دل سے نہیں کہہ رہے، مجھے آپ کے ساتھ جھوٹ پکڑنے والے ٹیسٹ کرنا چاہیے۔
عامر خان نے پوڈکاسٹ کی میزبان ریا چکرورتی کی بات پر مسُکراتے ہوئے پُراعتماد انداز میں کہا کہ آپ کروالو ٹیسٹ۔
واضح رہے کہ گزشتہ دنوں عامر خان کے بڑے بیٹے جنید خان نے انکشاف کیا تھا کہ ان کے والد عامر خان نے انہیں پروڈکشن سنبھالنے کا حکم دیا کیونکہ وہ ریٹائر ہونا چاہتے ہیں۔
