لاہور: پاکستان مسلم لیگ (ن) کے رہنما خواجہ سعد رفیق نے کہا ہے کہ غیرملکی مہمانوں کی پاکستان آمد پر جھگڑا پاکستان تحریک انصاف ( پی ٹی آئی) کی پرانی روایت ہے۔
خواجہ سعد رفیق نے سماجی رابطے کی ویب سائٹ ایکس (ٹوئٹر) پر پیغام میں کہا کہ میڈیا اطلاعات کے مطابق پی ٹی آئی نے 15 اکتوبر کوشنگھائی تعاون کانفرنس کے موقع پر احتجاجی کال کی واپسی کو اپنے قائد سے ملاقات کروانے سے مشروط کر دیا ہے۔ غیر ملکی مہمانوں کی پاکستان آمد پر جھگڑا کرنا پی ٹی آئی کی پرانی روایت ہے۔ کارکنان اور قانون نافذ کرنے والے اداروں کو آئے روز ایک دوسرے کے سامنے کرنا نہایت خطرناک کام ہے۔
ن لیگی رہنما کا مزید کہنا تھا کہ جوتم پیزار اور تصادم سے گریز کرکے جگ ہنسائی سے بچا جائے۔ پی ٹی آئی کو احتجاج کی کال غیر مشروط طور پر واپس لینا چاہیے۔ حکومت کو پی ٹی آئی رہنماؤں اور عمران خان کی ملاقات کا اہتمام کرنا چاہیے۔ ملاقات کروا بھی دی گئی تو پی ٹی آئی احتجاج کا کوئی اور بہانہ نکال سکتی ہے مگر حکومت کو احتجاج کا عذر ختم کردینا چاہیے۔ دور عمرانی میں طویل دورانیے کی جیلوں میں ہمیں وکلا یا اہل خانہ کے ساتھ ہفتے میں ایک ملاقات کی اجازت تھی۔ سیاسی یا ذاتی دوستوں کو اجازت نہیں تھی۔
