ممبئی: بالی ووڈ کے 65 سالہ سینئر اداکار سنجے دت نے شادی کی سولہویں سالگرہ پر اپنی اہلیہ مانیاتا دت کے ہمراہ دوبارہ شادی کے پھیرے لے کر اپنی محبت کے عہد کی تجدید کی۔
سنجے دت کی اپنی اہلیہ سے دوبارہ شادی کی ویڈیو انسٹاگرام پر وائرل ہورہی ہے جس میں دیکھا جاسکتا ہے کہ سنجے دت ایک مندر میں پنڈت کی موجودگی میں دوبارہ سات جنموں کا وعدہ کرتے ہوئے اپنی بیوی کے ساتھ پھیرے لے رہے ہیں۔
اگرچہ جوڑے کی جانب سے ابھی تک تقریب کی کوئی باقاعدہ ویڈیو کسی سوشل میڈیا پلیٹ فارم پر جاری نہیں کی گئی، تاہم مندر میں بنائی جانے والی ان ویڈیوز نے سوشل میڈیا صارفین کی توجہ حاصل کرلی ہے۔
ویڈیو میں دوبارہ شادی کے وقت سنجے دت نے زعفرانی رنگ کا دھوتی کرتا اور ان کی اہلیہ مانیاتا نے سفید رنگ کا پرنٹڈ لباس پہنا ہوا تھا اور دونوں ایک پنڈت کے منتروں کے درمیان ایک دوسرے کا ہاتھ تھامے آگ کے گرد پھیرے لے رہے تھے۔
حال ہی میں اداکار سنجے دت نے انسٹاگرام ایپ پر اپنی اہلیہ مانیاتا دت کو شادی کی سولہویں سالگرہ کی مبارک باد بھی پیش کی۔
سنجے دت کی جانب سے انسٹاگرام پر پوسٹ کی جانے والی ویڈیو کے کیپشن میں اداکارہ نے لکھا کہ ’’ہیپی اینی ورسری مانیاتا، میری زندگی کا بہترین حصہ بننے کےلیے آپ کا شکریہ اور آپ نے مجھے جو 2 خوبصورت بچے دیے ہیں، ان کےلیے بھی آپ کا بے حد شکریہ‘۔
اداکار نے اپنی اہلیہ سے اظہارِ محبت کرتے ہوئے مزید لکھا کہ ’’میں آپ سے بے حد محبت کرتا ہوں اور زندگی کی آخری سانس تک آپ کے ساتھ رہنا چاہتا ہوں اور رہوں گا، شادی کی سالگرہ مبارک ہو مانیاتا‘۔
واضح رہے کہ سنجے دت اور مانیاتا دت کی شادی 7 فروری 2008 میں گووا میں واقع تاج ایگزوٹیکا میں ہوئی تھی اور ان کے دو جڑواں بچے شاہ ران اور اقرا ہیں۔
