پشاور: مشیر اطلاعات خیبر پختونخوا بیرسٹر سیف نے کہا ہے کہ رانا ثنا اور دیگر لیگی رہنما 8 ستمبر کا انتظار کریں انہیں لگ پتا جائے گا۔
اپنے بیان میں صوبائی مشیر کا کہنا تھا کہ مسلم لیگ ن کے رہنما پرانی روش پر چل کر جلسے کے حوالے سے غلط فہمیاں پیدا کررہے ہیں۔ ان کے غیر ذمے دارانہ بیانات فوج اور عوام میں دوریاں پیدا کرنے کی کوشش ہے۔ مینڈیٹ چوروں کے غیر ذمے دارانہ بیانات پر صرف افسوس ہی کیا جاسکتا ہے۔
انہوں نے کہا کہ رانا ثنا اللہ سمیت تمام لیگی رہنما 8 ستمبر کا انتظار کریں لگ پتا جائے گا۔ کل کا جلسہ عمران خان کی ہدایت پر ملتوی کیا گیا تھا۔ خیبر پختون خوا سے علی امین گنڈاپور کی قیادت میں جلسے کے لیے تمام تر تیاریاں مکمل تھیں، لیکن انہوں نے عمران خان کے حکم کے آگے سرتسلیم خم کیا۔
بیرسٹر سیف نے کہا کہ کسی بھی انتشار سے بچنے کے لیے جلسہ ملتوی کیا گیا تھا۔ مسلم لیگ ن کو اپنی بقا انتشاری سیاست میں نظر آتی ہے۔ رانا ثنا اللہ ہر وقت ماڈل ٹاؤن جیسے واقعات کی تاک میں بیٹھا ہوتا ہے۔
انہوں نے کہا کہ 8 ستمبر کو عوام کا ٹھاٹھیں مارتا ہوا سمندر اسلام آباد کی طرف رواں دواں ہوگا۔ وزیراعلیٰ خیبر پختونخوا علی امین گنڈاپور کی قیادت میں بڑا قافلہ جلسے میں شرکت کرے گا۔
