لاہور: پاکستانی فلم اسٹار ریشم نے شکوہ کیا ہے کہ لوگ اُن کے لنگر بانٹنے پر اُنہیں تنقید کا نشانہ بناتے ہیں اور ساتھ ہی اُن کی کمائی کو حرام قرار دیتے ہیں۔
ریشم پاکستان کی وہ واحد اداکارہ ہیں جو گزشتہ 6 برس سے 12 مہینے اپنے ہاتھوں سے لنگر بناکر غریب عوام میں بانٹ رہی ہیں، اداکارہ کے اس نیک عمل کو جہاں سراہا جاتا ہے تو وہیں اُن کے پیشے کی وجہ سے اُنہیں تنقید کا سامنا بھی رہتا ہے۔
حال ہی میں ریشم نے اپنے ایک انٹرویو میں کہا کہ مجھے فلم انڈسٹری چھوڑے ہوئے تقریباََ 15 سال ہوگئے ہیں، میں کبھی ماڈلنگ کرتی ہوں اور کبھی کسی ٹاک شو یا ایوارڈ شوز میں شرکت کرلیتی ہوں، اس سے میری جو بھی آمدنی ہوتی ہے وہ میں لنگر میں لگا دیتی ہوں۔
ریشم نے کا کہ میں نے اللہ تعالیٰ سے وعدہ کیا تھا کہ میں اپنی آخری سانس تک لنگر بانٹتی رہوں گی، میں گزشتہ 20 برسوں سے لنگر کا کھانا بانٹ رہی ہوں لیکن گزشتہ 6 سال سے میں خود اپنے ہاتھوں سے لنگر بنا رہی ہوں اور یہ سلسلہ پورا سال جاری رہتا ہے۔
اداکارہ نے شکوہ کرتے ہوئے کہا کہ لوگ میرے نیک عمل پر بھی انگلیاں اُٹھاتے ہیں، لوگ کہتے ہیں کہ میں حرام کی کمائی سے لنگر بنا رہی ہوں، میں اُن لوگوں سے یہی کہنا چاہوں گی کہ حرام اور حلال کا فیصلہ کرنے والا اللہ تعالیٰ ہے۔
اُنہوں نے کہا کہ لوگ مجھے یہ بھی کہتے ہیں کہ آپ لوگوں کو کھانا کھلانے کے بجائے اُنہیں روزگار دیں، میرے پاس اتنے وسائل نہیں ہیں کہ میں کسی کو روزگار دے سکوں، صرف ایک گھر ہے جس میں میری رہائش ہے۔
ریشم نے کہا کہ پہلے ایک دیگ اور روٹیوں کا انتظام 50 ہزار میں ہوجاتا تھا لیکن اب مہنگائی کی وجہ سےاُسی لنگر کا انتظام ڈیڑھ لاکھ تک میں ہوتا ہے۔
اداکارہ نے مزید کہا کہ میں یہ کام صرف اللہ تعالیٰ کی رضا کی خاطر کررہی ہوں، وہی مجھے ہمت اور طاقت دیتا ہے۔
