دہرادون: بھارتی گلوکار اور ریپر ادتیا پراتیک سنگھ سیسوڈیا عرف بادشاہ نے ہردیش سنگھ بالمعروف ہنی سنگھ کے ساتھ طویل عرصے سے جاری جھگڑا ختم کردیا۔
بھارتی میڈیا کے ریپر بادشاہ نے ریاست اُترکھنڈ کے دارالحکومت دہرادون میں ہونے والے اپنے کنسرٹ کے دوران سرِعام ہنی سنگھ کے ساتھ جھگڑا ختم کرنے کا اعلان کیا۔
بادشاہ نے کنسرٹ میں اپنی لائیو پرفارمنس کے دوران مختصر وقفہ لیا اور پھر کہا کہ وہ ساری غلط فہمیاں دور کرکے آگے بڑھنے کے لیے تیار ہیں۔
گلوکار نے کہا کہ میں نے ایک غلط فہمی کی وجہ سے ہنی سنگھ کے خلاف اپنے دل میں رنجش رکھی، میں اس غلط فہمی پر خوش نہیں تھا اور میں اب تمام رنجشیں ختم کرنا چاہتا ہوں۔
اُنہوں نے کہا کہ مجھے نظر آگیا ہے کہ جب میں اور ہنی سنگھ ساتھ تھے تو اُس وقت ہمیں جوڑنے والے لوگ بہت کم تھے جبکہ ہمیں الگ کرنے والے لوگ بہت زیادہ تھے۔
مزید پڑھیں: ہانیہ عامر نے بادشاہ سے تعلقات کی خبروں پر خاموشی توڑ دی
بادشاہ نے مزید کہا کہ میں آج اعلان کررہا ہوں کہ میں ہر جھگڑے اور غلطی فہمی کو دور کرنا چاہتا ہوں، میری دُعائیں اور نیک تمنائیں ہنی سنگھ کے ساتھ ہیں۔
دوسری جانب ابھی تک ہنی سنگھ نے بادشاہ کی جانب سے کیے گئے اعلان پر کوئی ردعمل نہیں دیا۔
واضح رہے کہ بادشاہ اور ہنی سنگھ بھارت سمیت دُنیا بھر میں بےحد مشہور ہیں، دونوں گلوکاروں نے سال 2006 میں دیگر ریپ گلوکاروں کے ہمراہ اپنے بینڈ کا آغاز کیا تھا۔
ان کے بینڈ نے ‘بیگانی نار بری’، ‘کھول بوتل’ اور ‘دہلی کے دیوانے’ جیسے کئی ہٹ ریپ سانگ پیش کیے تھے لیکن پھر ہنی سنگھ اور بادشاہ کے درمیان جھگڑا ہوگیا تھا جس کے بعد دونوں نے سوشل میڈیا پر ایک دوسرے کے خلاف پوسٹس جاری کی تھیں۔
